انبوكس أكتر
وصية أب مكسور لابنه وعمره ٥ سنين الذي أخذه السوسيال
Aa
رسالة وردت لمنصة أكتر وصية أب مكسور لابنه وعمره ٥ سنين الذي أخذه السوسيال
أول ما ولدت يا ابني حبيبي حطوك ع صدر ماما حتى تاخد من حنانها بعدين أنا حملتك وشميتك وشكرت ربي عالخلقة التامة.
أنا بعدني متذكر تفاصيل ولادتك يا بابا وعيونك ورموشك الطويلة يلي لفتوا نظر كل الممرضين ومتذكر أول خطوة وأول ضحكة وأول مرة قلت اسم بابا.
ومتذكر كيف ضميتك إلي وهمست بإذنك الله أكبر، بسم الله الرحمن الرحيم
بس يا ترى بعدك متذكرني يا بابا، بعدك متذكر لما كنت ناديلك أبو الجوج وأنت تقلي أبو السيم
متذكر ريحتي وشكلي يا بابا أو شفت حدا بيشبهني وأنت بعيد عني؟
متذكر كيف كنا نلعب سوا بالسكوتر ونعمل سباق!
أو متذكر لما علمتك تسوق البسكليت وصرنا نركض عالبحيرة ولا نسيتني يا ابني!
ولما كنا نفوت نلعب سوا بغرفة الألعاب وتقلي لازم رتبها قبل ما تجي ماما.
بتتذكر لما نلعب بلايستيشن وخليك انت تفوز عليّ حتى شوف عم تضحك.
ولما قعدت بحضني وصرت تسوق سيارتي الكبيرة
متذكرني يا بابا!
أنا ابوك يا بابا، والله العظيم اشتقتلك كتير
أديه صار وزنك وطولك؟ وكم مرة قصيت شعرك؟ احكيلي عم تفرشي سنانك متل ما علمتك؟
انا اسف يا ابني، منعوني احضر عيد ميلادك بس والله اشتريتلك ألعاب كتيرة وجبت قطعة كاتو صغيرة وحطيت عليها 5 شموع وغنيت أنا وصورتك لحالنا عيد ميلاد سعيد.
أنا ما نسيتك لحظة يا عيون بابا
صاروا 180 يوم ما شافت عيوني عيونك يا بابا لأن السوسيال اخدوك مني ومنعوني شوفك
لو تعرف اديه صعبة عليّ يا بابا بس إيماني بالله عم يصبرني.
أملي فيك يا بابا إنك تسامحني، بس القرار مو بأيدي لأن والله ظلموني وعاقبوني فيك وأنت طفل، وبس تكبر رح تتعلم وتعرف حقيقة كل شي.
يا ابني رح تتعلم القراءة وتقدر تقرأ هي الرسالة بس تكبر، بس يمكن معناها رح تفهمه لما تصير بعمري ويمكن بس تصير أب متلي.
أنت ابني وروحي وعصفوري بس سرقوك مني، بس الله كبير، وعم ادعي يا ابني كل لحظة ترجعلي وشوفك وأكيد الله سامعني وشايفيني ورح يستجيب إلي يا عيون بابا
بس والله قهرني غيابك ودبحني يا بابا..
تنويه: المواد المنشورة في هذا القسم هي رسائل وصلت إلى هيئة تحرير منصة أكتر الإخبارية، وتنشرها كما وردت، دون تدخل منها - سوى بعض التصليحات اللغوية الضرورية- وهي لا تعبّر بالضرورة عن رأي المنصة أو سياستها التحريرية.